ايوه انا عارف ... ان انا غبت عليكو كتيير

يااااااه

وحشني اوي اوي البلوج ووحشتني الكتابة فييه
واللى اكتر من كده
وحشني اي حد كانت بيقراه وبيعلق فيه

بجد بجد بجد وحشتوني اوي اوي

حوالي اربع شهور من اخر مرة كتبت فيها في البلوج

انا الحمد لله بخير وتمام التمام

الفترة اللى فاتت حصلت فيهاحاجات كتيرة اوي اوي ان شاء الله حبقى احكيهالكو كلها

لكن اهم حاجة فيها ان انا الحمد لله لقيت شغل جديد بعد الشغل اللى كان في القاهرة واللى يمكن كانت الحسنة الوحيدة اللى فيه ان انا عملت فيه البلوج ده

اكيد طبعا حتسألو انا كنت غايب ليه الفترة اللى فاتت دي كلها

الحقيقة انا مش عارف سبب معين

يمكن زهق .... يمكن احباط انى حسيت انى بكلم نفسي

ويمكن ويمكن ويمكن

لكن المهم دلوقتي اننا رجعنا نتكلم تاني

وان شاء الله حعملكو مفاجاة قريب جدا

بس ادعو انها تحصل

وحشتوني مرة تانية ويلا بينا تاني نكمل البلوج

سوا ومع بعض

جعلتني مجرمـا

جعلتني مجـرمــا

بطـولة
احمد حلمي - غادة عادل -حسن حسني - ريهام عبد الغفـور- ادوارد

قصـة
نادر صلاح الدين

انتـاج
الباتروس للانتاج السينمائي - الاخوة المتحدين

تاريخ العرض
2006

موسيقى تصويرية
نبيل على مـاهر

الايرادات
13 ونص مليون جنيه

اخــراج
عمـرو عـرفـة

قصــة الفيــلم

الفيلم بيحكي عن شاب بسيط " رشدي أبـاظة " واللى متخرج من كلية التجارة وفاتح مكتب على أده للدعاية الاعلانات كان عايش في امان الله وفي عيشة بسيطة وبيحاول يبتدي من الصفر ويكون نفسه كاي شاب بس مشكلته انه لسه بيدور على الصفر
على النقيض وفي الطرف الآخر "ملك " بنت المليونير البخيل " أدهم الشاذلي " واللى عايشة حياة مرفهة ومستريحة اوي الى ان تلجأ الى حيلة عشان تاخد فلوس من أبوها البخيل
بتطور الموضوع يتورط " رشدي أباظة " في خطف ملك وتبدأ الأحداث الكوميدية الى نهاية الفيلم
وياتري حتنجح " ملك " في انها تاخد الفلوس من باباها ؟؟؟؟؟
شوفو الفيلم وانتو تعرفو

التعليــق

الفيلم الصراحة لذيذ اوي وبسيط كده زي بقية افلام احمد حلمي ولكن على حسب ماسمعتو انه مطب صناعي اجمد منه بكتير على العموم حنشوف وخلينا الأول في الفيلم ده

كان الكاتب موفق في اختيار الظروف اللى تخلي ملك تقابل رشدي اباظة ومكنش الموضوع كله اشتغالة او استظراف زي ما بيحصل في بعض الأفلام واللى هيا عملته قبل وبعد ما يتقابلو ملائم للشخصية اللى طلعة بيها في الفيلم اللى هيا البنت الجريئة الطايشة اللى ممكن تعمل اي حاجة على عكس صديقتها سالي اللى بتضرب لخمة في اي حاجة تعملها

انسياب الأحداث كان سريع ومفيهوش ملل ولا مط وكان منطقي ويمكن اللى شاف الفيلم يحس انه قصير او سريع وفعلا ده ناتج من انه رتمه سريع ومفيهوش اي ملل زي ماقلت

اختيار المخرج للساحل الشمالى كمكان لخطف ملك كان اختيار جميل جدا اولا لانه خرج من جو القاهرة الخنيق و ادي للمشاهد فرصة انه يشوف مناظر طبيعية احلى زي البحر وكده سواء باليل او النهار وتاني حاجة لان خلاص حكاية انها تتخطف في مكان قديم وفيلا مهجورة دي اتعملت كتير اوي قبل كده

الموسيقى التصويرية كانت معبرة عن احداث الفيلم وتحس كده انها خفيفة برده زي الفيلم وبسيطة

بالنسبة لأداء الممثلين فاداء حلمي مفيهوش تغيير عن افلامه السابقة وكزلك غادة وريهام الاولي البنت الشقية والتانية البنت الخجولة اللى مش بتعرف تعمل حاجة لوحدها بالنسبة بقى لادوارد واللى كان مفاجاة ليا انه دمه خفيف فعلا وطلع بافيه جديد اللى هوا " حبيبي " وده بيأكد اننا منحكمش بالشكل علي الممثل نستني لغاية مانشوفه حيعمل ايه حسن حسني كان معقول في الفيلم ومهما كرر نفسه فالواحد برده بيضحك معاه وميتخيلش الدور ده من غيره
في بنت جديدة طالعة بدور كريمة السكرتيرة الصراحة انا معرفش امسها الحقيقي ايه ولكن بقولكو استنوها فهيا موهبة مبشرة ودمها خفيف

مجمل الكلام انك لو عاوز تتفرج على فيلم ومتشغلش دماغك ولا ترهققها وتسترخي كده ادامه وتضحك
ارشحلك فيلم " جعلتني مجرما


والى اللقاء في فيلم أخر قريبا

هوا كان بيكدب ولا لأ ؟؟؟؟؟؟

من حوالى اسبوع كده كنت خارج انا وصحابي
كنا تلاتة ولسه حنبتدي الخروجة فوقفنا شاب
باين على شكله انه نضيف وابن ناس
المهم
قالنا معلش لو مش مستعجلين تحبو تسمعو حكايتي
انا كنت حقول لا من الأول وخلاص
لكن صحابي قالو اوكي

المهم قعد يحكي انه من السويس وجي اسكندرية عشان كان في انترفيو في فندق فورسيزون والحمد لله انه اتقبل
ولكن مشكلته انه في شنطة فيها الفلوس والموبيل نساها في التاكسي وسواق التاكسي مش بيرد عليه وراح عمل محضر في القسم والكلام ده كله

طبعا انا مختصر الكلام
المهم انه في كل حواره كان بيتخدم كلمات انجليزية كتيير بلازمة وبدون لازمة
المهم طلب مننا تمن التزكرة للسويس
وانه حييرجع بعد يومين عشان الشغل
وفي نفس الوقت ممكن ناخد ضمان باسبوره

الصراحة احنا قلنا اسفين ومش حينفع وكده
بس انا كنت شايف انت في كلامه حاجة مش مقنعة
مفيش مجال ازكرها هنا لانى مقولتش الكلام بتاعه كله

المهم الشاب اعتزلنا وهوا متاثر اوي وقال انا عارف انى بشحت بس اعمل ايه
وعلى العموم شكرا ليكو

بعد ما مشي الشاب ابتدا تأنيب الضمير لكل واحد فينا
واللى تقدروا تقولو بوظ الخروجة علينا
وابتدينا نقول ياتري يا هل تري
هل كان صادق ولا لأ ؟
وكل واحد يقول رأيه والحجات اللى شاكك فيها في كلام الشاب وهكزا

لدرجة انه بعد ما مشي بدقيقتين من تأنيب الضمير بتاعنا وقبل منتناقش في الموضوع كنا حنناديله وحندور عليه
ولكننا ملاقيناهوش

الموقف ده خلاني انى افكر هل كان صادق ولا لأ ؟
وانه بسبب الناس اللى بتحترف المواضيع دي سواء بادعاء المرض او مواقف خيالية ممكن يكون ظلمو واحد فعلا حصله موقف زي ده
وخاصة ان كل واحد فينا ممكن يتعرلضو وهوا مش في بلده
وده كان اكتر شيء مأنبنا

هل فعلا بقى الكذب والناس اللى بتكدب طاغيين على الصدق والصادقين ؟؟؟؟
هل مبقناش نثق في حد غريب عننا لمجرد انه غريب واكيد اكيد بيكدب

كل التساؤلات دي لحد دلوقتي في دماغي
ومش لاقيلها اجابة
وحبيت اسمع ارائكو فيها
يمكن نوصل لحاجة

وبتمني ان الشاب ده لو فعلا كان صادق ان ربنا يكون بعتله حد يساعدو
امين

حسني راح ....حسني جه

مسرحية سخيفة اوي بتتعرض دلوقتي اسمها حسني راح ...حسني جه
بطولة حسني عبد ربه لاعب الاسماعيلي

يعني موضوع انتقال حسني للأهلي او انه حيكمل في الاسماعيلي مش اخد اكتر من حجمه وبس ده دخل في التفاهة نفسها
كل شوية تسمع كلام وتقرا كلام وكله عكس بعضه وكل واحد بيقول اي كلام وخلاص
ابتداء من رئيس النادي لمدير الكورة لمش عارف مين

اللى ينرفز فعلا البرامج الرياضية في مختلف القنوات مكبرين الموضوع اوي
وحبة حبة حنلاقي في الجزيرة نبأ عاجل : انتقال حسني لقلعة محمد علي باشا
وبتخللي اللى مالوش قيمة يبقى نجم والناس تتكلم عنه

اكتر برنامج تابعته عن الموضوع والحقيقة ده مكانش مخصص فقرة ده كان مخصص الحلقة كلها للأخ حسني
راح الاسماعيلية وقابل الناس هناك وقابل ابو حسني وكلم اين خالته واللى جايبين حسني

ايييييييييييييه يا عم انت وهوا
ايه التخلف العقلي ده

لا وكله كوم وجماهير الاسماعيلي كوم تاني اللى يعيط واللي يقولك ده خاين ( هوا راح يبني منك له ولعب لصالح اسرائيل ) واللى يقولك انا بقولك يا حسني فيه مليون غيرك
طب متجيبهم يلعبو ياخويا وتريحونا من وجع الدماغ ده
واللى يشتم رئيبس النادي ويقوله ( شعب الاسماعيلية مبيضحكش عليه ياكومي ) على اساس ان الاسماعيلية دي جمهورية لوحدها ولا جزيرة كده في البحر

حاجة تشل والله

لا وكله كوم واللى سمعتو من الناس اللى جايبنهم انه اتضرب في ميدان السلطان حسين اللى في الاسماعيلية وكسرولوه عربيته والكلام ده عايد على حسني

وطبعا لا تعليق على الحادث ده لانه حيكون كلام مش لطيف في حق حبايبنا جمهور الاسماعيلي العريق

اللى يفرس بقى ان في اخر الحلقة ابن خالته اتصل وقالك ان حسني بيفاوض الأهلي انه يرجع للاسماعيلي
يا لهوي على الشلل
طب رحت ليه يا كوتوموتو
مش عشان الفلوس ؟
ولا هما وحشوك دلوقتي في الاسماعيلية
وكل واحد يقولك انا بأمن مستقبلي
يبني هوا بيدولك اربعة حنيه
؟؟؟؟؟؟

وسمعت وكيل أعماله امبارح بيقول ان شكلنا بقى وحش اوي في فرنسا وان احنا طلعنا نصابين
والجرايد بتكتب ان سترازبورج نجي من فخ وعملية نصب

ماشي ياعم اتبسطت كده

فهمتو ليه بقى اننا عمرنا ماحنعرف نكسب بطولة عليها القيمة ولا حيكون عندنا لعب كورة بجد
من الهبل اللى احنا شايفينه

على النقيض تماما نلاقيلك عمنا الكبير تيري هنري راح لبرشلونة من الارسنال
يعني 3 اسماء يخضو اصلا هنري + الارسنال + برشلونة
حد سمع ان حد لجأ للفيفا ؟؟؟
حد سمع ان جماهير الارسنال شتمت تيري و لا رئيس النادي قاللو ارجع يابني لبيتك
والارسنال محتاجلك ؟؟؟؟
ابدا عملوله حفلة وداع في انجلترا
وحلة استقبال في اسبانيا
وخلص الموضوع على كده
وسلملي على حسنك عبد ربه

ملاحظة في سؤال اكيد بيلح على حد منكو دلوقتي وهوا انى انا ليه بوجع دماغي وبتفرج علي الهبل ده ؟
والله مش انا السبب السبب ابويا اللى بيتفرج على الكلام اللذيذ اوي ده
ادعولي بقى انى استحمل

وبقول لحسني انى انا كرهتك الصراحة وحتى لو جيبت الأهلي حتبقى اول واحد اكرهه وهوا بيلعب في الأهلي
وده لقب مشرف ليك ولأمثالك

وابتدي المشوار

متهيألى اننا كده كلنا اخدنا الأجــازة وفي ناس كمان نتايجها بانت بتمني للناس كلها التوفيق كنا من فترة كتبنا موضوع اسمه عيب أوي واتكلمنا عن انه عيب اوي اللى بيحصل لينا واتفقنا اننا نتغير وكل واحد يكتب هوا عاوز يعمل ايه - بالمناسبة محدش كتب حاجة غير توكا بس ان شاء الله انا عارف وواثق انكو حتكتبو بإذن الله تعالي .... حبتدي النهاردة المشوار مشـوار التغيير والنجــاح

المهمــة الأولــي

احلى كلام ...... كلام ربنا سبحانه وتعالي

احسن كتاب ...... القرآن الكريــم

طيب ايه رأيكو نبتدي باحسن الكلام واحسن الكتب

الصراحة مش لاقي احسن من بداية لمشوارنا الطويل احسن من كده

كلنا طبعا كنا حافظين ايات وسور من القرآن الكريم ويمكن ابتدينا كمان من واحنا صغيرين بجزء عم

فينا اللى كمل وحفظ القران كله .... وفينا اللى كمل ووقف لحد جزء معين .... وفينا اللى نسي اللى حفظه ..... وفينا اللى مكملش اصلا

انا شخصيا كنت بكمل واقف .... واكمل واقف .... وانسي وارجع اراجع تاني

اكتر حصيلة حفظتها كانت حوالى سدس القرآن ..... يعني حوالي 5 اجزاء ولكن متفرقين

يعني سورة من هنا على جزء كامل من هنــا

وبرده رجعت وقفت

بتفكرو في اللى انا بفكر فيه ؟؟؟؟؟
اقولكو بفكر في ايه ..... كل واحد بيقول دلوقتي ياااه لو كنت كملت كان زماني خلصت الحفظ او وصلت لتلتين القرآن او نصه او .... او

طيب خللى ده على جنب

ايه رأيك تاخد لقب بــاشا ؟؟؟ ولا بلاش عشان اللقب ده من المفترض انه ملغي
ايه رأيك تاخد لقب الاستاذ الدكتور / فلان الفلاني وسطرين كده تحت اسمك بيقولو انجازاتك

طب بصو ايه رأيكو تاخدو لقب

من حفظة كتاب الله أو من حفظة القرآن الكريم

حسيبكو دقيقتين تحسو بحلاوة اللقب ده وعظمته

الله .... بجد لقب روعــة وشرف ما بعده شرف ان اي واحد ينوله

طب يلا بينا بسرعة بقى ناخده

حيلك حيلك انت مفكر انه بالساهل ؟؟؟؟

حقولك انا مش اصدي بسرعة اننا ناخده ونحطه قبل اسمنا انا اصدي بسرعة ننوي من دلوقتي اننا ناخده اننا بجد نبقى

من حفظة كتاب الله

طيب الموضوع ده محتاج ايه ؟؟؟؟

محتاج اولا واخيرا توفيق من الله عز وجل بس خللى عندك ثقة في ربنا
اكيد ...... ربنا لما يلاقيك عاوز تحفظ كلامه ويسيبك
أكيد ....... حيساعدك و يسهلك طريقك لحفظه للنهاية

بس الموضوع يا جماعة محتاج نفس طويييييل ومحتاج صبر اوي
بس في النهاية ان شاء الله حنوصل

اول خطوة انا عاوزكو تعملوها
طلعو ورقة وقلم واكتب اسماء السور وتحت كل سورة اكتب ارقام اياتها في جداول وكل خانة من 1- 10

مثال :

البقرة 1-10 / 11-20 وهكـذا

وهاتو القلم اللى بيعمل تظليل ده الفسفوري جميل كده ؟

وابتدي راجع اللى انت حافظه
كل ماتحفظ 10 ايات علم عليهم بالقلم بس ايه حفظ تمام وبالتجويد مش سلق بيض هوا

الطريقة دي الصراحة انا بحبها لانها بتحفزني دايما انى اخلص اللى عليا
لو حد عنده طريقة تانية يعملها
او لو حد عاوز لسه يتعلم التجويد او بحب يكون وسط جماعة عشان يتشجع يروح لاي مركز لتعليم التجويد وحفظ القران

وهما الحمد لله منتشرين كتيير واسعارهم - لو خدو فلوس - قليلة اوي

خلاص ..... عرفنا ايه اول مهمة في طريق التغيير

اتمني بقى ان كل واحد فيكو يدخل يقول هوا عمل ايه

عشان بعد فترة ننتقل لمهمة اخري بإذن الله تعالى

شكر خـاص

شكر خاص لتوكا على اسهامتها بأرائها غالبا في جميع مواضيع البلــوج

هيا اللى بتحسسني انى مش بكلم نفسي

بشكرك جدا وان شاء الله عقبال الباقي

ونتيجة لذلك المجهود بهديكي ،، وسام الشرف الستفوتي من الدرجة الأول ,,

وبرده ان شاء الله حكمل حتى لو واحد بس اللى يرد عليا

ديـابي ولا قمراوي ولا تموري ولا ايه بالظبط

يا عم عمــرو هوا الكينج و مفيش غيــره "

" بس يا بني منك له وللديابية وبس شريط عمرو الجديد نازل يوم كزا وعلى ضمانتي "

" طوارئ في جميع المواقع والمنتديات استعدادا لنزول شريط عمرو الجديد "

" لعيون القمــر وعشان خاطر كل القمراوية البوستر الجديد لالبوم مش عارف ايه "

" وراك يا تامر لفين متروح احنا وكل التمورية حتى لو دخلنا السجن "

حد سمع الكلام اللى فــات ده قبل كده ؟؟؟

اكيد لو دخلت منتديات الاغاني حتلاقي الكلام ده كتير ويا سلام بقى لو المنتدي ده فيه روابط لعشاق المطرب الفلاني والعلاني

ويا حلاوة بقى لو المطرب ده عاملينله منتدي لوحده تبقى حاجة اخر اليستا

ايه يا جماعة اللى بيحصل ده
!!!!!!!!

بجد وصلت بينا التفاهة لكده !!!! ووصل بينا الفراغ اننا نقعد نضيع ايام من عمرنا علشان نجيب اخر بوستر لعمرو وسامبل لتامر و لحن للقمر ؟؟

حتقولولي ياعم محبكها ليه ما كل واحد وليه مطربه المفضل

بغض النظر عن ان الاغاني حرام ولا حلال وده موضوع مش حخوض فيه

اقولك ماشي ياعم كل واحد ليه مطربه المفضل اللى بيحب يسمعه لما يكون فاضى في وقت فراغه او في عربيته او في حاجة هوا بيعملها كده ومش محتاجة تركيييز

انما الموضوع يوصل لانك تبقى مكرس كل حياتك عشان تجيب خبر او صورة او حتة من اغنية لسه حتطلع يبقى لا
الموضوع محتاج وقفة

بصو اقولكو حاجة انا بحب مصطفى قمر
دخلت منتدي ليه كرهته من الناس اللى فيه

اللى عمال يقول انا قمراوي وبحب عيونك يا قمر
واللى يقولك لو انت قمراوي بجد ادخل

ومحسسني ان مصطفي قمر رجع الآندلس ولا حتى حرر القدس
انا مش بتريق عليه انا مليش دعوة بيه

ولكن كل شيء زاد عن حده اكيد اكيد يتقلب ضده

بس الصراحة كله كوم واللى بيحبو عمرو كوم تاني
متهيألى دول اتفه ناس في مصر وحازو على
" Tafaha AwarD "

ومحدش يقوللى انت كده بتشتم فيهم يا جماعة بجد ادخلو على موقع
www.dvd4arab.com
وشوفو الرابطة اللى عاملينها لعمرو دياب وشوفو التفاهة بعينها ومناخيرها وكل حاجة
ملاحظة: انا اديت لينك الرابطة عشان تتأكدو من اللى بقوله وانا برئ من اللى حينزل اغاني او اي حاجة تانية

حديكو مثالين : لما طلع رامي صبري فضلو يشتمو فيه وكأن ده شيء طبيعي ولا حتى المشرف اعترض ولا حذف المشاركات دي
اللى يقولك ده شبه عبده الحلاق واللى يقولك ده مجرد شبيه لعمرو واللى عمله طارق العريان وكلام كده ملوش اي لازمة

حتى تامر حسني اتشتم ووصفوه بالصرصار

حاجة تحرق الدم فعلا

المهم واحد حيقولى طيب يا عم ما في الأهلاوي والزملكاوي والبرشلوني الخ

حقولك جمييل جدا انك اثرت النقطة دي
اولا : انا برفض التعصب في اي حاجة يعني لو انا اهلاوي اشحع فرقتي وخلاص لا اشتم ولا اجرح في الناس لاننا في الأول وفي الآخر مسلمين وميصحش نعمل كده

ثانيا : لو انت اهلاوي او زملكاوي انت مش بتشجع شخص واحد انت بتشجع كيان بحاله متمثل في النادي

بمعني لو الأهلي بيلعب سلة او يد او قدم حشجعه حشجعه حتى لو معرفش الناس اللى بتلعب دي
ولو افترضنا زاعو متش من ايام صالح سليم برده حشجع الأهلي
ولو كمان افترضنا ان انا انعزلت عن العالم لمدة 10 سنين وجعت اشوف متش ومعرفتش لعيبة الأهلي حشجعه برده لأنى اهلاوي

اذا انا مش مرتبط باشخاص معينة ولا بوجوه معينة

ثالثا : دي رياضة يعني افيد برده من الآغاني على اي حال من الأحوال

اللى عاوز اقوله لكل واحد من الناس اللى بيسمو نفسهم على اسامي المغنيين
يبني انت وهوا
انت كده بنحصر دماغك وتموتها في شخص واحد بس وهوا مهما طلع ولا نزل فمجر د شخص ومهنته انه بيغني
ممكن انت تكون احسن وافيد منه بكتيييير
وهوا مسيره يموت في يوم من الأيام وسعتها حتندم على كل الايام والثواني اللى ضيعتها في الهبل اللى انت بتعمله

فوقوا يا جماعة في حجات كتيرة اوي ممكن تعملوها وتشجعوها وتكرسو لها وقتكو
اهم من مجرد بوستر او حتة 40 ثانية من اغنية اتقالت في حفلة

وفي الآخر
انت ديابي ولا قمراوي ولا بقى ليك رأي تاني ؟؟؟؟؟؟؟؟؟

ICDL - Module 3

دلوقتي الساعة 10

قبل معاد امتحاني بساعة واحدة

ان شاء الله حمتحن امتحان الوورد بتاع شهادة ICDl

ربنا يعديه على خيييير زي ما عدي امتحان الويندوز على خييييييير

وربنا يوفقنا كلنا

وان شاء الله لما ارجع حقولكو على النتيجة

يلا سلااااام

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الحمد لله يا جماعة نجحت

وجبت درجة عالية كمــان

عقبال باقي الامتحانات ان شاء الله

الله يا أهلي .... الله يا زمـالك

أحسن نهــائي كأس في العالم لهذه السنــة

اعتقد ده العنوان الوحيد لهذه المبــارة .....ففعلا ده احلى نهائي كاس السنة دي في العالم

احلى اكيد من اي نهائي كاس عربي واحلى من نهائي كاس أسبانيا واحلي من نهائي كاس انجلترا ( اللى كان ممل جدا ) واحلي من نهائي فرنسا

امبارح الواحد كان فخووور جدا ان في بلده ناس بتلعب بالطريقة دي وبالجمال والحلاوة دي والفرصة كانت حلوة لاظهار الجمال ده في وجود حكم ادار مبارة ريال مدريد وبرشلونة في الدوري واللى قال بعد المتش انه ده شرف كبير ليه انه يحكم متش زي ده واللى بالمناسبة المتش بتاع امبارح شبه متش برشلونة والريال اللى في الدور التاني وخلص 3- 3

لما ابتدا المتش عمري مكنت اتصور انه حينتهي بالصورة ولا احداثه حتكون كده انا كنت متوقع اننا ( الاهلي يعني ) حنفوز وخلاص عشان ناخد الكاس ونثبت ان الزمالك كسب المتش واحنا نقصين كل اللعيبة تقريبا

الشوط الأول كانت فيه فرص حلوة ومؤكدة اكتر للأهلي ولكنهم ضيعوها كلها واكتر فرصة واحلى فرصة في المتش كله بتاعة عمرو زكي اللى لعبهاله جمال وخدها على الطاير دي لو كانت دخلت جون كان حيبقى روعــة


بداية الشوط التاني كانت محزنة ليا عشان الزمالك جاب جووون وكمان جون من غلطة فادحة من الدفاع وأمير


قبل المتش قلت لبابا ان عمــاد حيجيب النهاردة ويخرج من صومه للتهديف وفعلا ده اللى حصل وجاب جووون جميل جدا من لعبة شبه اللعبة بتاعت اول هدف للزمالك
بعدها اعتقدت ان خلاص الأهلي حيكمل تفوقه ويخلص على المتش ولما نزل شيكابالا قلت انه المفروض كان ينزل بعد هدف الزمالك الأول عشان الأهلي ميخدش فرصة ويهجم اوي

ولكن احبطت لما لقيته جاب جووون وجت في دماغي الزملكاوية يقولو انه شيكابالا الاهلي مش حيقدر عليه الى اخر الكلام ده
وفضلت فرص الأهلي تضيع بغرابة شديدة وخاصة بتاعت اسامة حسني اللى قلت بعدها يبقى احنا اكيد مش حنكسب والزمالك رجع ورا خالص وانكمش

ولكن قبل النهاية ومن كورة في 18 الزمالك ووسط دفاعه يجيب تريكة هدف التعادل ويرجع الأمل تاني

ونلعب اشواط اضافية وايه اللى يحصل ده
ايه ياعم جمال الجمال ده جون عالمي فعلا ومن شوطة حلوة اويييييي يجيب التالت وبرده من تمريرة لشيكابالا
قلت برده خلااااااص مش حنجيب


لكن برده زي ما قلت ان عماد حيجيب كنت حاسس ان اسامة ربنا حيوفقه ان شاء الله
وفعلا جبنا جونييييين ورا بعض



والمتش انا كنت سعتها واثق انه لسه مخلصش بس الحمد لله كانت في فرصة لشيكابالا الخطييير والأخطر في القائم لعمرو زكي

ولكن الحمد لله ربنا ستر

لو انا كنت بلعب المتش ده كان يبقى همي الوحيد انى اكسب المتش بغض النظر انه نهائي الكاس وحيجيب بطولة يعني لو كان الأهلي اتغلب مكنتش حزعل عشان ضاعت بطولة لا
كنت حزعل عشان المتش ده هوا اللى ضاع لانه يستحق ان يكون احلى متش للأهلي والزمالك في تاريخهم

ده تتويج فعلا لأحلي جيل في النادي الأهلي بشهادة اللعيبة بتوع زمان في جميع الاستوديوهات التحليلية والحمد لله انى عايش في الجيل ده

بقول لجماهير الزمالك الله يخليكو شجعو الفرقة دي وكان منظر كويس ان في جماهير شجعت بعد المتش ولو انى كنت عاوز كل جماهير الزمالك تفضل بعد المتش

ويارب يارب السنة اللى جاية الدوري يحسم في اخر اسبوووع وحتى لو خسرناه ولكن ادام فرقو زي زمالك امبارح دى
انا مش حزعل بس ياريت يكون عندنا كورة كده دايما في مصر

المتش ممكن كل واحد فينا يتكلم فيه للصبح ولكن كفاية كده انا طولت قوي واسيبكو مع اهداف المتش

مبروك للأهلي ومبروك للزمالك

مبرووووك للكرة المصريـــة

أهــــداف الأهـــــلي

أهـــداف الزمــــالك








آخـــر صــورة لرونالدنيو بعد متش الأهلي والزمالك

وقت الجد ...... اتقطعتوا بجد

ها يا معلمين

ها يا اسمعلاوية

فين ؟ فين الدراويش واللعب الجميل واللعب الظريف

ولا انتو فالحين في الدوري وبس ؟

وفالحين لما نكون ناقصين او نكون مجهدين ؟؟؟؟

ملعبتوش امبارح ليه ؟ ولا كنتو مفكرين انه لسه في متش عودة ؟؟؟؟

على العموم انا زعلان

اه بجد زعلان لاننا كسبنا 2 بس وشايف ان لعيبة الأهلي كانوا بيتدلعو

متش زي ده كان المفروض على الأقل يخلص 4

لكن حظكو بقى

بس قطعناهم يا معلم وده اهم متش من التلات متشات اللى لعيبناهم فيهم

الأهلي كان بيلعب كويس والصراحة انا منتبهتش لخطة اللعب والكلام ده

لانى كنت متنرفز من اللعيبة وعاوزهم يطحنوا الاسماعيلي وميطلعوش من ال 18 بتاعتهم وكان ممكن ده يحصل

يلا مش مشكلة تتعوض

اما بالنسبة لأمير ( اللى راح يشرب كوباية شاي مع الحضري في وسط المتش ) انا محستش بيه امبارح على عكس اخر متش في الدوري

اللى اانا قريت كاريكاتير في الأخبار بيقول ان الاسماعيلي فاز على امير عبد الحميد 1- 0 وده بيوضح ان امير الوحيد اللى كان بيلعب في المتش ده

على العموم فوز مستحق جدا للأهلي وبالنسبة لضربة الجزاء انا شايف انها مش صحيحة

ولكن كان لينا ضربة تانية صحيحة لعماد برده لما جون الاسماعيلي كعبله

لكن دي مع دي وخالصين كده


الدور على الحلوين حبايبنا الطعمين

وان شاء الله حنفوووووووز يا توتاااااا

الاستطلاع لحد دلقوتي 60 % الأهلى و 40 للزمالك

ومحدش عطي صوت واحد للاسماعيلي وده شيء طبيعي

ان شاء الله يوم 2-7 نلتقي ونحتفل بالكاس الحمراء للعاام التاني على التوالي

سلاااااااااااام

معلــومـــات عـــامـــة 1

الانتـــربـــــول

الانتربول هو هيئة الشرطة الدولية لتعقب الجريمة عبر دول العالم ، وقد تم تأسيس هذه الهيئــة سنة 1923 في فيينا ثم انتقل مقرها الى باريس سنة 1946

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

أطـــول خطوط السكك الحديدية

يوجد في الولايات المتحدة الأمريكية أطول خطوط سكك حديدة في العالم وقد قدر طول هذه الخطوط سنة 1980 بنحو 296489 كيلو متر

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الإذاعـــــة المصــــــريــــــة

بدأت الاذاعـة المصرية ارسالها سنة 1934 ، وكانت تابعة لشركات خاصة وفي سنة 1947 اصبحت تابعة لسيطرة الحكومة المصرية ، وتعتبر الاذاعة المصرية من أوائل الاذاعات في الشرق الأوسط

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الفــــــــــــاو

منظمة الفاو هو الاسم المختصر لمنظمة الأغذية والزراعة ، وهي احدى الوكالات المتخصصة للأمم المتحدة ، وقد اسست سنة 1945 ، وهي تهدف إلى تحسين انتاج الغابات والمزارع وتحسين ظروف التغذية ، يوجد مقر المنظمة في رومـــا

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الجيوبولوتيكا

هو علم دراسة البيئة الطبيعية وعلاقتها بالبيئة السياسية وكان أول من عرفها هو أرسطـــو

معلومات لغويـة 1

أصـــل كلمـــة فلـــس

من وحدات العملة المستخدمة في بعض الدول العربية ( الفلس ) وهي كلمة يونانية الأصل وقد تم تحريفهـا من ( فوليس ) إلى فلس وكانت هذه الكلمة تطلق على الكيس الذس به النقود ولعل هذه الكلمة هي أيضا الأصل لكلمة ( فلوس ) والتي تعني النقود بالعامية المصرية

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الزبـــرقـــــان

من الأسماء العربية القديمة والتي قد تطالعنا في كتب التاريخ اسم ( الزبرقان ) وتعني : البدر في تمام كماله

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

النهيـــق والزفيــــر

من المعروف أن صوت الحمـــار يطلق عليه النهيــق ، ولكن النهيق هو صوت الحمـــار في آخره أما في أوله فيطلق عليه الزفيـــر

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

بيشــــاور

مدينة " بيشاور " هي مدينة باكستانية تقع بالقرب من ممر خيبر وهي تشتهر بانتاج نوع من الأرز يعرف باسم بيشاور وكلمة بيشاور هي من كلمات اللغة الهندية القديمة وتعنى " مدينة الزهــور

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

أصـل كلمــة سفسطائي

من أهم الكلمات التي تستخدم لوصف انسن بكثرة الكلام وقلة الفعل كلمة " سفسطائي " وهي كلمة من أصل يوناني أخذت عن الكلمة " Sophisma " وتعني المهارة والحذاقة والبراعة الشديدة ، وأصبحت الكلمة تعني الخداع لأن السفسطائيين كان هدفهم اقناع الآخرين بآرائهم حتى وان كانوا يعلمون أنها خاطئة.

حكايـات قهـوة كتكــوت

حكــايــات قهــــوة كتــكــوت

الكــاتب : محمود السعــدني
دار النشـر : أخبــار اليوم
عدد الصفحــات : 167
السعـر : 5 جنيــه

لو لاحظتم اننى في مقدمة الكتاب لم اضع نوعه فصراحة انى على علمي الضئيل لا اعرف ان اصنفه هل هو يعتبر ادبي أم تأريخ ام حكيات ساخرة أم ماذا بالظبط
هذا هو كاتبنا الكبير جدا محمود السعدني أو على حد تعبيره عمنا محمود السعدني
كاتب لا تشعر معه بالملل ولا بالوحدة ، ساخر الى اقصي درجة ومع ذلك فإنه عميق جدا في كتاباته لو اردت ان تستفيد من خبرات غيرك في الحياة أو ان تعرف أشياء لم تكن تسمع عنها من قبل فإني انصحك وبشدة ان تقرأ لمحمود السعدني ولن اقول اكثر من ذلك عنه

كتاب حكايات قهوة كتكوت هو عبارة عن سرد وحكايات لشخصيات حقيقية كان يعاصرها الكاتب في تلك القهوة الشهيرة جدا في الجيزة ايام الأربعينات والخمسينات من القرن الماضي

مع كل صفحة من صفحات الكتاب تشعر بأنك تري وتسمع ما تقرأه من جمال الوصف واسلوب التعبير لعمنا الكبير السعدني وتشعر وانت تتنقل انك عايش مع تلك الشخصيات تردي ان تتكلم وان تضيف حوارا معهم وتتنقل بين الكتاب وانت تعجب بهذا وتسخط على هذا لا تستطيع ان تمر مرور الكرام على اي شخصية

اراد الكاتب من خلال وصفه للشخصيات ان يقول لنا ما هي احوال البلاد في تلك الحقبة الزمنية التى شهدت الكثير والكثير من الأحداث والتغيرات السياسية الهامة سواء في العالم او في مصر وذلك اسلوب ذكي فعلا فبدلا من ان يسرد حقائق تاريخية جافة يدعك تعيش تلك الفترة من خلال اهلها الذين كانوا يعيشون فيهـا

تبدأ الحكاوي في أوج تألق قهوة كتكوت ومعلمها الى ان تنتهي بزوال هذه القهوة العريقة مما يؤكد ان للقهوة تأثير كبير جدا في حياة حياة الناس والمجتمع وخاصة اذا كان يتردد عليها فئات وطبقات مختلفة مثل هذه القهوة التى كان يتردد عليها مفكرين و محاميين وكومبارس وعمال طبقات كثيرة واختلاف شديد في التفكير


شخصيات كثيرة حكي لنا عمنا حكاياتها منهم من كان ذو شأن ولكن دار عليه الزمن ، ومن كان فقيرا فاصبح غنيا ومنهم من كان يعتلي منصبا ويفقده ويغيب ويرجع مرة اخري ويغيب ويرجع ، حتى ريعو جرسون القهوة لم يتركه عمنا

عمنا الكبير اجاد وبرع في تصوير كل ذلك مما يؤكد لكي تكون كاتبا مميزا يجب ان تكون تسمع و تري وتكون حاد الملاحظة لما يجري حولك واهم من ذلك أن تفهمه

اترككم الآن بعد هذا التحليل ولن أقول غير " يجب أن تقرؤا هذا الكتاب

لن أعيش في جلباب أبي

لن أعيش في جلباب أبي

الكاتب : إحسـان عبد القدوس
النوع : رواية
دار النشــر : أخبــار اليــوم
عدد الصفحــات : 152
السعـر : 6 جنيـه

بداية وقبل أن ابدأ في اعطـاء انطباعي و رأيي عن القصة احب أن انوه عن فكر احسان عبد القدوس وعدم ملائمته في كثير من العبارات والمواقف للدين الاسلامي واحيانا يستخدم جمل استطيع ان اقول انها حرام
فلذلك عندما نقرأ رواية له يجب علينا توخي الحذر وعدم اخذ اي راي ديني له والاكتفاء بالعمل الأدبي وتسلسل الأحداث



روايـة لن أعيش في جلباب أبي تحولت الى مسلسل تلفزيوني شهير واعتقد اننا كلنا قد تابعناه وشاهدناه ولكن في الحقيقة فهذا العمل يختلف عن القصة أو الرواية في عدة نواحي كما ستلاحظون عندما تقرأو القصة ولكن دعونا أولا نتكلم عنها


القصة تحكي عن عائلة عبد الغفور البرعي تاجر الخردة الشهير والمليونير الأمي وأثر هذا المليونير و أمواله في حياتهم وقد ركز الكاتب على شخصيتين من ابناءه جعلهم محور احداث القصة وهم عبد الوهاب ونظيرة

عبد الوهاب ذلك الشاب الذي يرفض تماما ان يسير على نهج والده ويرفض ان يعمل معه و ظل بتخبط بين مشاريع دراسية فاشلة الى زيجة فاشلة وتنقل من فشل الى اخر دون ان يعرف ماذا يفعل او على الأقل ماذا يريد غير انه لا يريد ان يعمل مع والده

نظيرة تعتبر الوحيدة من أبناء عيد الغفور البرعي التى حققت نجاحا مشهودا فهي في الجامعة الأمريكية و ذكية الى حد كبير وفي نفس الوقت تحب ابيها حبا كبيرا كل هذه الصفات أهلت منها ان تكون شخصية مختلفة تماما عن اخواتها سنية وبهيرة ونفيسة

تلك الصفات لفتت نظر حسين - صديق عبد الوهــاب - لكي يقع في حبها ولكن تحدث احداث كثيرة خلال علاقتهما ببعضهما اراد الكاتب فيها ان يوضح لنا تأثير ثروة عبد الغفـور على ابنائه سواء بالسلب او بالايجــاب

فهناك من نجح بسببها ومن فشل بسببها ومن نجح في شيء قد يفشل في شئ آخر بسببها أيضا

تستمر أحداث القصة من خلال نظيرة وحسين الى ان تنتهي ويأتي على لسانهما احداث بقية الشخصيات وانا اعتقد ان هذا شئ لا يصلح لرواية اجتماعية فيها شخصيات كثيرة ان تركز الحوار على اثنين فقط ولكن ربما كان هذا نوعا من انواع الحوار او سرد الأحداث
ولكن رغم ذلك فان القصة كانت ستكون ممتعة أكثر لو لم تكن شاهدت المسلسل لاني كما قلت هناك اختلافات سأترككم تعرفوها بنفسكم كلها كانت لصالح المسلسل

في النهـــاية اقول ان الكاتب أراد ان يوضح ان ثروة الأب لاتكون في كل الأحوال شئ جميل ونافع ولكنها قد تتسبب في تدمير الأبنــاء

عيـب أوي

عيب أوي ...... نكون اقل ناس بنقرا واحنا اول كلمة في نزلت في القرآن " اقرأ "

عيب أوي ...... نكون اقل ناس استخدما للكمبيوتر واحنا امة العلم

عيب أوي ...... نكون اقل ناس في الرياضة واحنا المفروض نعلم اولادنا السباحة والرمايه وركوب الخيل

عيب أوي ..... ان محدش فينا بيتكلم لغات صح والمفروض اننا نعرف لغة عدونا عشان نأمن شره

عيب أوي ..... عيب أوي ..... عيب أوي

وحجات تانية كتييييرة اوي ممكن نتكلم فيها للصبح

لكن دلوقتي مش وقت الكلام ........ ده وقت الفعـــــل

ايوه محدش يستهزأ بالموضوع او يقول ياعم يعني احنا اللى حنصلح الدنيا

ماهيا كده كده بايظة

لا يا جماعة
بصو من الآخر كده لو حنفكر بالطريقة دي يبقى نروح نموت احسن

ايوه احنا اللى حنغير الدنيا

ايوه احنا اللى حنخلي كل حاجة تمام وزي الفل

لانه ببساطة حنبتدي بنفسنا

كل واحد فينا مطلوب منه انه يفكر في نفسه في المرحلة دي

ايه اللى ناقصه عشان يكون انسان طبيعي

ايوه طبيعي لان انا اللى كاتبه فوق ده ( الكمبيوتر والرياضة وكده ) مش معناه اننا حنكون سوبر او مفيش حد زينا

**ولو عاوز يشاركنا بيه يدخل بكتبه وانا برجح كده عشان ممكن نستفاد بأفكار بعض وبتوجهات بعضنا وكمان ممكن يكون حاجة زي التزام بتنفيذ او وعد كل واحد فينا قطعه على نفسه عشان يبقى احسن **



معلش دي مجرد مرحلة البداية

ان شاء الله ان شاء الله الموضوع ده حيستمر لمدة طويييييييلة اوي

فخليكم معايا وان شاء الله كلنا نبقى حاجة تانية


وانا حعلق ان شاء الله واشارك في اللى نفسى ابقى عليه

ولتكن دي مرحلة بداية جديدة لينا

ووقفة في حياتنا

ربنا معاكو

اهلا يا جماعة
انا عارف طبعا ان 99 % منكم في امتحانات الفترة دي
فعشان كده انا مأجل اى موضوع جديد
لغاية ما تخلصو بالسلامة وعلى خييير
وعلشان محسش انى كما ن بكلم نفسي

على العموم طمنوني عليكو وياريت كل واحد يخلص امتحاناته
يدخل يسيب تعليق في الموضوع ده


يلا
سلاااااااااااام

مبروك يا زملكاوية

مبروك يا جماعة عليكو المباراة
والصراحة تستحقوا الفوز لأنكو لعبتو والأهلي النهاردة معملش حاجة خالص

الصراحة انا شايف ان أمير بس هوا اللى شال المتش واعتقد المباراة دي نقطة جديدة ويوم ميلاد ليه من جديد
حقيقي ادي مباراة رائعة
والسبب في الجونين من وجهة نظري أحمد السيد الصراحة غلطتين قاتلتين

اكتر حاجة مدايقاني في الماتش ده ان انا مش يبقتنع ان لعيبة في نادي كبير زي الأهلي ميقدروش يشيلو الفرقة لأنهم مجرد احتياطين
الكلام ده غلط المفروض يكونوا اد اللى بيلعبوا وميأثرش غياب اي لا عب مهما كان في أداء فريق 11 لاعب.

على العموم الف مبروك وياريت تفضلوا جامدين كده عشان نلاقي حد نلاعبه
واستنونا في الكأس

واهو يا توتا بقول كلام بالحق اهو عشان متبقيش تزعلى من حاجة بعد كده
واكيد انتى فرحانة دلوقتي
ماشي ماشي
معادنا قريب

بس ايه رأيكو بقى في جماهير الأهلي ؟؟؟؟
اظن مفيش حلاوة بعد كده
ناس محترمة بجد وعارفة يعني ايه تشجيع
دى كان صوتها اعلي من صوت جماهير الزمالك
ربنا يخليهم للفريق بجد
وعقبال الناس ال ....... ما يتعلموا ولو انى اشك في كده

لقاء قمة ..... ملوش لازمة

النهاردة متش الأهلي والزمالك

او عاوز اصحح حاجة نشئين وبدلاء الأهلي و الفريق الأول للزمالك

ومحدش يفتكر انى بقول كده عشان لو اتغلبنا ولا حاجة
لااحنا ممكن نكسب وافتكروا متش الكاس اللى في التمانينات

انا بس بوضح الفرق اللى حتلعب النهاردة

وهوا متش مش حيفرق في النتيجة ولا حاجة
فمحدش ياريت يقعد يقول الكلام المشمشي ان ده بطولة خاصة ومش عارف ايه
اتشطر يا كبتن منك له في البطولة الأصلية ماشي

ولو يا جماعة اتغلبنا- احنا الأهلي يعني - مش مشكلة خالص والله
برده الزمالكاوية مصريين ويهمنا انهم يفرحوا
افرح يا عم الحج منك له حراام وخدو البطولة الخاصة بتاعتكو دي
وانا حوصي سمير زاهر يجيبلكو درع ونكتب عليه البطولة الخاصة وتحطوه في دولاب النادي
ولقائنا بعد المتش ايا كانت نتيجته مع التحليل



** فاضل بقى شئ مهم الصراحة وهو جماهير الإسماعيلي المحترمة جدا
انا قصدي على اللى راحوا اخر متش وغالبا هما هما اللى في كل متش في الآستاد

البهوات بعد ما جابوا جون بالعافية وبدل ما يشجعوا فريقهم - وطبعا كعادتهم قاعدين سا كتين بس انا عرفت السر ورا ده ان الاستاد جنبيه بيوت فهما مش بيرضوا يشجعوا عشان ميصحوش الناس النايمة في البيوت شفتو الاحترام اد ايه - فضلوا يشتموا في الأهلي وشتايم مقلكش عليها
وطبعا كان الصوت عالي
واي حد معرض ان عيلته تكون قاعدة ادام التلفزيون مامته أو اخته وعقبال ما يغير القناة حيكونو سمعو حبة شتايم على الماشي

جمهور عجيب والله يا بنى منك له شجع ناديك
ثم انا مش فاهم ليه شتموا الأهلى
هوا لا معاهم في البطولة المعوقة اللى هما فيها
ولا بينافسهم في الدوري
ولا حاجة
هوا حقد وغيظ وخلاص

انا وراكو والزمن طويل وا ن شاء الله تتربوا كده قريب

أفلا يتدبرون في خلق الله ؟؟؟؟

style="font-family:verdana;">بالصدفة البحتة شاهدت أمس برنامج على قناة Animal PLanet ي

تحدث عن الحياة البرية في اندونسيا اسمه Wild Indonesia - وسأحاول باذن الله ان احضر لنكاته الى البلوج - وكانت الحلقة الحلقة تتحدث عن الحياة البحرية في اندونسيا




واندونسيا عبارة عن أرخبيل ( عدد كبير جدا من الجزر ) وعلى حسب ما ذكر البرنامج فانها تحتوي على كل أنواع الشواطئ من شواطئ رملية وجبلية و ... و ... و .....

حقيقة مناظر طبيعية مبهرة ويعجز اللسان عن وصفها




وطاف بنا البرنامج في الأعماق وشاهدت اشياء لم اكن اسمع عنها ولا أعرف عنها مقدار ذرة
كائنات بحرية كثيييرة لأول مرة القي عليها نظرة

وكل كائن له شكل وصفات وطريقة حياة مختلفة تماما عن الكائن الذي بالقرب منه

ويا سبحان الله الخالق المقتدر حقا
فكل كائن له سلاح يدافع به عن نفسه مهما كبر او صغر
له وسائل لكي يحصل بها على رزقه

انى متردد الآن هل أحكي ما رأيت ام ماذا ؟؟؟؟
لن احكيه لانه من الأفضل ان يري ولا يوصف بالكلام
وان شاء الله سوف احضر هذه الحلقات فادعو لي بانى اجدها

ولكن سأكتفي بوصف كائن واحد فقط



انه نوع من الأخطبوط البحري
هذا الكائن ماكر جدا وهبه الله المكر لكي ينجو بحياته
فإنه اذا احس بكائن اقوي منه يستطيع ان يغير لونه الى اللون الأسود في ثوان لكي يخيف به هذا الذى سوف يفتك به
ليس هذا ما وهبه الله فقط
ولكنه ممثل بارع ايضا يستطيع ان يتقمص شخصيات وحركات أسماك وكائنات اخري لكي يستطيع التمويه على فريسته او من يريد ان يفترسه

حقا انه كائن مدهش




سبحان الله انى اعجب حقا بعد كل ما رأيت لمن يقولون انه لا وجود لله وان هذا الكون كله وجد من تلقاء نفسه
كيف ثم كيف والف كيف ؟؟؟؟
اذا كنتم تتكلمون بالعقل فأنتم أغبي خلق الله
واذا كنت تتكلمون بالأدلة والبراهين فكلها تشير الى وجود الله

فمن خلق كل تلك الكائنات وهداها سبلها فى رزقها والدفاع عن نفسها
يا سبحان الله




اكثر ما آلمنى هو ان كل من قام بعمل هذا الفيلم ليسو مسلمين
ياااه الى هذا القدر من التخلف وصلنا ونحن المأمورين بالتفكر في خلق الله
وكان من الواجب علينا ان نقوم نحن بتصوير الفيلم وعرضه على اولئك الذين ينكرون وجود الله

لكن على الأقل ان نحاول ان نستفيد من هذه الأفلام الأكثر من رائعة
ونتدبر في خلق الله




لأنه في تدبر حياتهم عبرة ودروس لنا

وتبارك الله أحسن الخالقين

الألـــم

من منا يحب أن يتألم ؟؟؟؟

وإلى أي مدي تستطيع أن تتحمل الألم ؟؟؟؟

وهل تفضل لو انه لم يكن هناك ألم من الأصل ؟؟؟؟؟

بالنسبة لأول سؤال فان 100 % من الاجابات ستكون بالطبع لا ومن يجاوب عليه بغير ذلك ستعتبرونه مجنونا

اما السؤال الثاني فاجابته ستتفاوت من شخص إلى آخر

والثالث فستكون كاجابة الأول

ولكن تعالو نتخيل معا ما الذي كان سيحدث لو لم يكن هناك ألم ؟؟؟؟؟

تخيل انك طفل في الثالثة من عمرك ولأول مرة تري لعبة لونها جذاب وشكلها مغري بالإمساك بها ولكنها حادة الطرف مثلا
وكأي طفل لا يفقه شيئا ستمسكها وتحاول اللعب بها وفجأة تغرزها في يدك
وبالطبع ستصاب يدك بالجروح ولكن
ليس هناك أي ألم


من منا يستطيع ان يقرب يده من النار أو ان ينظر مباشرة في الشمس أو ان يقطع لحم يده أو اصابعه ( واثبتوا ان الأخيرة من المستحيل ان تحدث ان يعض انسان نفسه ) أو ان تضع اصبعك في عينيك الى ان ينجرحا

كل ذلك لا نستطيع ان نفعله

هل تعلمون لماذا ؟؟؟؟؟
بسبب الألم

هذا الاحساس الذي نكرهه جميعا
هو السبب في بقائنا أحياء بمشيئة الله تعالي

اذكر انه من فترة طويلة شاهدت برنامج " اوبرا " وكا ن يعرض حالة طفلة حالة نادرة وهي عدم شعورها بالألم
فكانت تضع اصابعها في عينيها والى كل الأشياء التى ذكرتها واخري
وكانت هذه الطفلة تحتاج مراقبة فائقة طوال الأربع وعشرين ساعة حتى وهي نائمة
ولاستحالة ذلك اضطر الأطباء الى تقييد حركتها ( ولن اذكر كيف لأنها كانت مؤلمة نفسيا أن اشاهد هذه الطفلة المسكينة ) حتى تكون عاقلة وتعي ماذا تفعل !!!!!

والآن ارجع الى أول الموضوع واعد اجابة الأسئلة مرة أخري ولكن هذه المرة فكر جيدا


فسبحان الله الذي جعل من الألم نعمة لا تعد ولا تحصي

انتظروا اهم قسم في البلوج

ان شاء الله سوف يتم افتتاح القسم الجديد والمهم جدا جدا جدا
وهو القسم الإسلامي للبلوج بعنوان " اسلاميات " وان شاء الله انا بحضر المواضيع الجديدة ليه في الفترة دي
وربنا يوفقنا كلنا ان شاء الله

انا عارف ان عندكو امتحانات وربنا يوفقكو وتخلصو على خيييير

وان شاء الله ححضر موضوعات عن الأجازة وازاي نستفيد منها
وتكون موضوعات نستفيد منها كلنا وانا اولكو وان شاء الله حتلاقو فيها حجات جديدة وتعجبكو بس كل واحد يبقى حاطط تصور في دماغه انه عاوز يعمل ايه في الأجازة ان شاء الله

شدوا حيلكو وزاكرو كويس

يلا سلام

لعنة الأهلي

لا كان على الخاطر ولا كان في النية
تتبهدل يا برشلونة بعد ما لعبت الأهلوية

ده النشيد الرسمي دلوقتي لجماهير برشلونة

والسبب في كده اللى بيحصلهم اليومين اللى فاتو من بعد ما غلبو الأهلي في القاهرة

فبرشلونة خسر لقب السنة دي كده من أولها وهوا لقب كاس اسبانيا
وادام مين خيتافي
وخيتافي يحتل المركز التاسع في الدوري
طب وبطريقة اعجب واغرب من الخيال
مباراة الذهاب كانت في نيو كامب في برشلونة وانتهت بفوز برشلونة 5-2 يعني نظريا خلاص
لكن حصلت المفاجأة وخيتافي طحنت برشلونة 4-0
وصعدت للنهائي

طيب اهي مباريات كاس وبتحصل مفاجات وكده
نغلق ملف الكاس بقى ونركز في الدوري ( يا تري الجملة دي بنسمعها امتى من فرقة حبيبتنا هنا في مصر )
اخر متش في الدوري وكان متش مهم جدا على الأقل يخللي برشلونة في الصدارة جم المعملين واتعادلوا مع ريال بيتيس
في الوقت اللى الريال ظبط نفسه وحول هزيمته لفوز مستحق الصراحة ولو انى مش بحب الريال بس الحقيقة تقال واشبيلية فازت برده ولسه الدوري شغال

ولسه حنشوف برشلونة حيحصل فيه ايه من لعنة الأهلوية



بمناسبة الحقيقة وحالة الصراحة اللى انا فيها دلوقتي دي
الواحد بقى يتكلم عن الزمالك شوية
الصراحة اخر ماتش كانوا جامدين وغلبوا الحرس 3 باستحقاق
والمتش اللى قبليه كانوا برده معقولين وقدروا يظبطو نفسهم في اخر دقايق المباراة
وياريت كده على طول
عشان بس نلاقي حد نلعب معاه
واديني اهو بقول الحق يا زملكاوية عشان محدش يزعل
ماشي يا توتا

بس برده حتتغلبوا دوري ان شاء الله
ومن الأحسن متقابلوناش في الكاس
يعني تخرجو من الأول كده

حاجة غريبة والله العظيم

بصوا يا جماعة
لو انت وواحد صحبك حد جه يوقع بينكو
والحد ده طبعا قال كلام على لسان كل طرف
تعملوا ايه ؟؟؟
اكيد اكيد حتتكلم انت وصحبك تستفهم منه هل الكلام ده قالوا ولا لأ
صح ؟؟؟
طيب
ولو انت وصاحبك ده شركاء في شغل او في حاجة معينة
اكيد اكيد يهمكو المصلحة المشتركة كمان
يعني حتتكلمو كده كده
طب اقولكو حاجة تانية
انت وأخوك
لو اللى جاي يوقع ده دخل ما بينكو ايه اللى يحصل ؟؟؟
طبعا مش محتاجة تخيل المفروض انه يتفرم

طب انا ليه بقول كل الكلام ده
لاني النهاردة الصبح ( الساعة 8 ) اول مابصيت على جرنان الأخبار لقيت خبر عجيب اوي

شبح الحرب ( الأهلية ) يخيم على الأراضي الفلسطينية

بصراحة انا اتخضيت
لا وبعد كده مقتل 15 واحد من الفلسطنيين ولكن على ايد بعضهم
يالهوي
ايه يا جدعان اللى بيحصل ده
بصو من الأول اللى حيرد يقول اصل اسرائيل بتوقع ما بينهم ومش عارف ايه
ميردش احسن
لاني زي ما قلت في المقدمة ان المفروض ان الكلام ده كله ميحصلش لمجرد ان في ناس بتوقع
والكلام ده المفروض ميحصلش اصلا
15 واحد ماتوا كده

وتقلب الصفحة تلاقي حبة عيال ( مش حقول شباب ولا رجالة ) ماشيين في الشارع وكل واحد مخبي وشه ومعاهم بنادق ومعرفش اييه وعمالين فوضي وذعر في شوارع غزة
لا راجل منك له
كب متتشطر منك له على ناس تانية
وانا مش اصدي بكده الفلسطنيين
لالالالالالا انا اصدي على العيال الهبل دول اللى ماشيين في الشارع
عشان محدش من اخواني الفلسطنيين يفهمني غلط او انى بتريق علي كل الفلسطنيين ولا حاجة

اقلب الصفحة واقرا نص كلمة بتاعة استاذ احمد رجب اتفجع اكتر
كان بيقول ان زعماء فتح وحماس راحو مكة وحلفو على المصحف ان محدش حيرفع في وش التاني سلاح
امال ايه اللى بيحصل ده ؟؟؟؟؟ ايه اللى انا شايفو ده

طب هل اللي ببحصل ده عشان اختلاف في وجهات نظر مثلا
ولا عشان صراع على الحكم
ولا ولا ولا
مفيش اي حاجة في الدنيا ينفع يكون مبرر للى حصل
وربنا يستر على اللى جاي

انا من رأي ان الموضوع ده من أسبابه واهمها التعصب
وحنبقي ان شاء الله نتكلم عليه
واسيبكو بقى في رعاية الله وياريت كلنا ندعي ان ربنا يستر

معلومات أدبية وثقافية 1

الشقيقـــات الثـــلاثــــة


للمؤلف الروسي الشهير " انطون تشيكوف " العديد من المسرحيات المؤثرة ومنها هذه المسرحية التى تتناول حياة الطبقة المتوسطة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــ

ملحمـــة الحـــرافيـــش


من أشهر أعمال الروائي " نجيب محفوظ " وهي تدور حول الحياة في المناطق الشعبية وأهلها البسطاء وعصر الفتوات وسطواتهم وصراعاتهم

ـــــــــــــــــــــــــــــــــــــــــــــــــــــــــــــــــــــــــــــــــــــــــــــ

ســــــارة


هي الرواية الوحيدة للأديب الكبير " عبـاس العقــاد " وظهرت في عام 1938

ـــــــــــــــــــــــــــــــــــــــــــــــــــــــــــــــــــــــــــــــــــــــــــــ

معلومات تاريخية 1

محــاكمــــات نورمبرج


عقب استسلام ألمانيا في الحرب العالمية الثانية يوم 7 مايو 1945 عقدت محاكمات لمجرمي الحرب في مدينة نورمبرج الألمانية من نوفمبر 1945 الى اكتوبر 1946 وقد تألفت هيئة المحكمة من الدول الحلفــــاء

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مدينــــة نينوي


هي واحدة من أعرق المدن في التاريخ ، وكانت توجد في العراق حاليا وبناها الملك " سنحاريب " الأشوري

على ضفاف نهر الفرات في حوالي سنة 750 ق.م وقد اكتشفت آثار تلك المدينة في منتصف القرن التاسع عشر

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

أول دولة مستقلة في الأمريكتين


تم اكتشاف القارة الأمريكية في نهاية القرن الخامس عشر وقد خضعت كل الدول للاحتلال الأسباني و البرتغالي والانجليزي والفرنسي
وكانت أول دولة تحصل على استقلالها هي الولايات المتحدة الأمريكية في 4 يوليو 1776 وهو ما يحتفلو به في كل سنة ويعرف باسم عيد الاستقلال

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

معلومات جغرافية 1

بـــــوليفيــــا


* احدي دول امريكا الجنوبية
* دولة داخلية ليست لها سواحل بحرية
* المساحة : 1.98581 كيلو متر مربع
* العاصمة : لاباز
* العملة : بيزو
* اللغة الاسبانية
* توجد بها حضارت هندية قديمة التي تسمي بقبائل المايا
_______________________________________




رومانيا

* من دول شرق أوروبا
* العاصمة : بوخارست
* العملة : ليــو
* المساحة : 237500 كيلو متر مربع
* تطل على سواحل البحر الأسود

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نيــــس

* هي أحد المدن الفرنسية السياحية
* تقع على شاطئ الريفيرا الفرنسية
* تقع في جنوب شرق فرنسا
* تعتبر من اهم مراكز صناعة العطور في فرنسا

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

خبر جديد ..... وافتتاح قسم جديد

مين منا عنده معلومات عامة كتيييرة؟؟؟؟؟

طب ولو عندك يا تري في اي قسم من اقسام المعرفة .؟؟؟؟؟

أدب - تاريخ - جغرافيا - رياضة -.........الخ

طب ايه رأيك يبقى عندنا معلومات في كل المجالات اللى انا قلتها وأكتر

اكيد طبعا موافقين ( هيا عافية بقى ) منا صاحب البلوج - وش بيطلع لسانه

يبقى خلاص


يلا بينا نبتدي رحلة المعلومات والثقافة

ونشوف مين فينا اللى حيكسب المليون


المليون معلومة

ياله من أسبوع ممل

الأسبوع ده ممل بشكل
قاعد كده زي القلة ويمكن القلة احسن وافيد مني
معملتش اي حاجة فيه
مرت الساعة ورا التانية وانا قاعد ادام الكمبيوتر كده
ومش بعمل اي حاجة مفيدة لا على الكمبيوتر او حتى في غيره
اللهم من اكتشاف مواقع جديدة او قراءة قصة لنجيب محفوظ

النهاردة الخميس وياريت الحق اعدل الاسبوع النهاردة وبكرة
ولو انى الصراحة مظنش

يا جماعة الوقت الوقت
يا ريت منضيعش وقتنا ومتعملوش زي
انا عارف انى حندم كتير اوي بعد كده على الوقت ده
بس امتى بالظبط

الله اعلم

هل حقا كانت تحبني 4 ؟؟؟؟؟

مضت الدقائق سريعا مؤكدة المثل الشعبي القائل ( الوقت الحلو بيعدي بسرعة ) ولكنه لم يكمن وقتا حلوا وحسب
وانما كان رائعا يبعث على قلبي بالسرور والفرح
فكانت تلك اول مرة اسعد فيها بحضوري سكشن الرسم من فترة بعيدة
كنت من وقت لآخر احاول ان اسرق منها بعض الكلمات لكي اسمع صوتها
متعللا مرة بالسؤال عن قلم او عن سنون قلم ومرة اخري متسائلا عن طريقة رسم شيء ما وانا بها اعلم

انتهت اول ساعة ونصف معها ومرت كأنها دقيقة ونصف
كل ما كان يدور في عقلي في تلك اللحظة هو كيف اقول لها اود ان اراكي مرة أخري ؟؟
كيف اقول لها ارجوكي لا تدعيني وحيدا مرة أخري ؟؟
وكان كل منا في فصل مختلف عن الآخر
فقلت لها وانا اعلم انها ليست معي في الفصل
اراكي في السكشن القادم
فقالت : ماشي ولم تعترض
فابتسمت لها وودعتها ومضينا كل في طريق

ولكن ما هذا لقد ابتسمت لي
لم تعترض حين قلت لها سأراكي مرة اخري
لا لن اقول لكم انها احبتني او اعجبت بي كما بقول اصحاب العقول الصغيرة او على وجه الدقة الذين ليس لهم عقول من الأصل
ولكن هل اطمأنت الى رفقتي ؟؟ هل سعدت بها كما سعدت انا بها ؟؟؟
قلت كلها نصف ساعة وسأراها مرة اخري
ولكن كيف نسيت بهذه السرعة انها ليست معي في فصلي
واني سأضطر الى الوقوف منتظرا اياها قبل وبعد السكشن

فليكن ولأنتظر فما الذي سيحدث لو انتظرت غير انى سأراها وتسر روحي لذلك


استمر الحال بيننا على ذلك من سكشن اكون بقربها وسكشن اخر اكون بقربها بقلبي فقط وجسدي في مكان اخر

بين انصاتنا للدروس والشرح وبين خوفنا من عقاب الكلام من احد المعيدين كانت كلماتنا قليلة وجملنا قصيرة
حتى بين الفترات المختلفة لم نكن نقف او نتحدث كثيرا
غير اراكي في المرة القادمة او سأحجز لكي مكانا بجانبي في المحاضرة القادمة
كانت كالنسمة معي لم تتذمر او تعترض لأي من دعواتي لها
لعلها فهمت محاولاتي بالتقرب لها ولم تعترض لذلك الأمر
ولكن حدث امر لم اكن اتوقع حدوثه
..........

عدنــــا

معلش على الفترة اللى فاتت واللى انقطعت فيها
الصراحة انا كنت مش في الموووود خاااالص
بس الحمد لله اهى فترة وعدت
وان شاء الله انتظروا الحجات الجديدة
واسف على التغيب
وأول حاجة حبتدي بيها
انى زودت قايمة مواقع كويسة بمواقع جديدة
ياريت تبقو تتابعو القايمة دي من فترة للتانية
لانها حتكون فيها مواقع حلوة اوي

SpanglisH

SpanglisH

معلومات عن الفيلــم
سنة الانتاج : 2004
النوع: رومانسي - دراما- كوميدي
مدة الفيلم : 131 دقيقة
أماكن التصوير : لوس انجلوس -كالفورنيا
الفيلم اترشح لجائزة الجولدن جلوب وحصل على 3 جوائز أخري

فريق العمــل
آدم ساندلر

باز فيجا

تيا ليونى

شيلبي بروس

المخرج والكاتب
جيمس بروكس

قصـة الفيلــم
الفيلم بيحكي عن عيلتين واحدة من امريكا والتانية من المكسيك العيلة الأمريكية اللى طبعا بيمثلها ادم سندلر وتيا ليوني وابنة ليهم قررت تجيب مديرة منزل او خادمة وطبعا كانت باز فيجا وبنتها شيلبي
باز فيجا كانت مبتتكلمش ولا كلمة انجليزي وبنتها بتتكلم انجليزي وبتتعلم في امريكا وهيا دي اللى حتبقى اداة الوصل والتفاهم بينهم
الفيلم بيظهر الفروق بين كلا من المجتمع الأمريكي والمجتمع المكسيكي من حيث تربية الأبناء وطريقة التعامل والأحاسيس بين افراد الأسرة وده ممثل في تيا ليوني وباز فيجا من جهة والأبناء من جهة أخري

تتطور الأحداث نتيجة لاندماج العائلتين في رحلة المصيف اللى قاموا بيها
وكانت دي فرصة اكتر لاظهار الفوارق وعلى فكرة لو انت اتفرجت على الفيلم مش حتلاقي اختلاف كبير اوي في التربية بين الأم المكسيكية والمصرية وخاصة في الفيلم ده

مش عاوز احرق الفيلم طبعا كالعادة ولكن هل تستطيع العائلة الأمريكية ان تأثر في المكسيكية كما هو العادة ان امريكا بتأثر على جميع الشعوب سواء بالسياسة او حتى بالأكل وافلام الكارتون
ام تستطيع الأسرة المكسيكية ان تحتفظ بقيمها وشكلها ؟؟؟

الفيلم بيناقش عدة قضايا من ضمنها كما ذكرت في السطور الماضية
انك هل حتقدر تحافظ على هويتك ومضمونك في وسط الهيمنة والسيطرة الامريكية
دي قضية والقضية التانية هي ان الحب لا ليه وطن ولا ليه لغة
دي باختصار قصة الفيلم واللى مرضتش احرقها لان الفيلم فعلا جدير انكو تشوفوه

الإخــراج وأداء الممثلين
اصراحة مش عارف ابتدي منين ولا منين الفيلم وانت بتتفرج عليه لا تحس بملل ولا تحس بالوقت والمشاهد ماشية ورا بعضها بدون ازعاج ولا اقحام وتحس ان الفيلم لو عاوز توصفه فيلم رقيق جدا ويرتقي بالمشاعر
سواء الحب او الأمومة وتربية الأبناء وازاى ان خوف الأم على اولادها بيخليها تضحي بحجات كتير
الخقيقة المخرج والكاتب في نفس الوقت قام بعمل رائع جدا جدا جدا
سواء في اختيار الأماكن وكمان في اختيار الممثلين ووصلت بيه المصداقية انه جاب ممثلة اسبانية ما بتعرفش تتكلم ولا كلمة انجليزي فعلا وهيا باز فيجا لدرجة انه كان فيه مترجم في موقع التصوير عشان يفهمها المخرج عاوز ايه
ياريت اللى عندنا يتعلموا بقى
الكاميرا احيانا كانت لغة الحوار الوحيدة في المشهد وده بيبان اوي في مشهد لما الأمين الامريكية والمكسيكية كانوا بيركبوا الأولاد اتوبيس المدرسة - خدوا بالكو من المشهد ده - مشعهد رائع فعلا
كمان في نقطة هامة ان احيانا مش لازم كل حاجة تتقال للمشاهد وكأنه غبي ومش بيفهم
المخرج والمؤلف في نفس الوقت سايب مساحة لحجات المشاهد يستنتجها من دون انه يقولها ولو حتى بكلمتين
وده شيء يحسب ليه طبعا انك تحس انك بتشارك في الفيلم يكل مشاعرك
فكرة ان العيلتين تروح المصيف مع بعض وانهم يجتمعو مع بعض فكرة حلوة اوي ادت للمخرج فرصة انه ما يشتتش المشاهد انه كل شوية يجيب مقارنات بين طرق حياتهم كل واحد على حدة
لا دول في مكان واحد ونشوف بقى مين اللى حيأثر على التاني
فعلا فكرة جميلة

بالنسبة لأداء الممثلين اللى بيعجبني في آدم ساندلر انه مش مصتف انه ممثل كوميدي وبس
في فيلم تاني ليه رومانسي جدا وحلو اوي - حتناوله ان شاء الله في موضوعات قادمة - اسمه
50 first dates
وده بيأكد انه مش كوميدي وبس كان اداءه سهل وبسيط وعميق في نفس الوقت فاهم الدور كويس ودارس ابعاده بشكل رائع
باز فيجا اللى اول مرة اشوفها او اسمع عنها - ليها فيلم جديد اسمه بابل مع برا بيت - كانت روعة
جمالها الساحر مكنش هوا ده الحاجة الوحيدة اللى تشدك ليها كمان كان ادائها يشدك اكتر واكتر
ادائها رقيق زيها وفعلا عملت دور عمرها واجمل مشهد عجبتني فيه لما كانت بتتخانق مع ادم وبنتها بتترجم

اكتر حاجة بتغظني في افلامنا ومسلسلاتنا تلاقي بعد ماجابوا كل الناس حتى العمال يكتبو والأطفال فلان وفلانة
مع انهم بيكونوا شايلين الفيلم في مرحلة ما ليه
ليه ميهومش بطولة او يعاملوهم كممثلين حقا حاجة متخلفة
تعالوا اتفرجو على اداء والدور بتاع البنتين اللى في الفيلم
بجد حاجة خرافة وخاصة بنت باز فيجا اللى كان ليها مشاهد اكتر
بجد متصدقش ان دول صغيرين وتحس انهم اتعلموا التمثيل من سنييين ولكن الموهبة الفطرية بتفرض نفسها
مش حتكلم كتير عنهم لانى عاوزكو تشوفوهم وتدوني رأيكو وخاصة مشهد بنت باز اللى في نهاية الفيلم وهيا بتعيط

عشان مطولش اكتر من كده احب اقول في النهاية ان الفيلم جدير بالمشاهدة لانكو حتستمعو بيه فعلا
وياريت اعيش واشوف افلام زي دي هنا حتى لو عملوه نسخة عربية منه مش مشكلة
والى لقاء في الفيلم القادم ان شاء الله

آه يا قفا

اهلا بيكو وفي القسم الجديد
نـــادي السينمــــا
الصراحة وقبل ما ابدأ الموضوع انا كنت ناوي اعمل القسم ده زي ما قلت قبل كده " شاهدت لك " مختص بتحليل الأفلام وبس
بس الصراحة شفت لقطة من فيلم بخيت وعديبة خلتني افكر اننا نعمله للمناقشات السينمائية عموما
مش مجرد تحليل الأفلام والمسلسلات
على العموم ده أول موضوع ويارب يعجبكو


الصراحة موضوع النهاردة غريب حبتين وزي ما قلت جالتالي فكرته من مشهد في بخيت وعديلة
المشهد كان فيه ( محمد هنيدي ) بتضرب على قفاه من عادل امام
الموضوع ده خلاني افكر هوا ايه حكاية ضرب القفا في السينما المصرية وامتى يخلص؟؟؟؟؟
الموضوع ده اعتقد انه من زمااااااان بحيث كان النجم ( واحد زى عادل كده ) يضرب اللى معاه على قفاهم بسبب وبدون سبب
يعني مثلا عادل وهوا مكنش لسه نجم وكان لسه طالع - وبحكم عادة السينما المصرية - لازم يتضرب على قفاه في الفيلم
وبالطبع اتكونت عقدة عند عادل واللى زيه واتمنو انهم يبقو نجوم مش عشان حاجة اكتر من انهم يردوا الكام قفا اللى اتضربوه وهما صغيرين
وفعلا لقينا مشاهد زي اللى في بخيت وعديلة ان عادل يبضرب هنيدي
وهنيدي بقى نجم ومشهور وبقى برده هوا كمان بيضرب بالقفا
ده غير كده حبة مشاهد ملهاش لازمة للضرب زي اللى في تجربة دانماركية في القسم وكمان المشهد العبيط خالص بتاع فيلم عريس من جهة امنية اللى كان بيضرب واحد ادام شريف منير واتضح في الآخر انه سواق شريف منير ومكنش واخد باله من اول المشهد !!!!!!!!!!!!!!!!!!!!!! حاجة تفقع
المهم
مازال مسلسل الضرب بالقفا مستمر في السينما
ومستنيين اي حد يوقفه
وربنا يسهل
والى لقاء في اول تحليل لفيلم واخترته انه يكون
SpanglisH

طلب بسيط

ازيكو يا جماعة
ليا عندكو طلب بسيييييييط
ياريت لما تدخلوا البلوج تدوسو مرة واحدة كل يوم على الاعلانات الموجودة تحت خالص في اخر الصفحة
عشان البلوج يستمر على طول ان شاء الله
وانا مشكور اوي ليكو
سلام

ايه النظام النهاردة

النهاردة المباراة العالمية والتاريخية بين

الأهلـى × برشلــونــة

المباراة تاريخية طبعا لانها احتفال الأهلى بأول مئوية لييييييه
والحمد لله اننا في الزمن اللى لحقنا فيه نشوف الاهلي بيحتفل بالمئوية
الفريق الأسباني وصل امبارح
وعقدوا مؤتمر صحفي كان رائع الصراحة ومنظم
وقالوا فيه كلمتين حلوين عن الأهلي لزوم الضيافة وكده
لكن حنعمل ايييييييه في الماتش ؟؟؟؟
ربنا يستر فعلا
لما شفتهم في الأوتوبيس قلت ده احنا حيدخل فينا اجوان بالموبايل يا معلم
بس الأهلي قدها ان شاء الله
واهم حاجة الماتش يطلع شكله حلو
وخاصة ان فيه اهتمام كبير جدا بالمباراة عالميا
وده طبعا نتيجة للى الأهلي عمله في كاس العالم
على العموم كعادتنا حنلتقي بعد المباراة ونحلل اللى حصل فيها

وكمان في النهاردة ماتش جامد جدا بين مانشستر و اي سي ميلان
وطبعا افضل ان مانشستر يكسب عشان يقدر يتأهل للنهائي
وحنلتقي بعد المبارتين
ان شاء الله

انتى ماما ....وانت بابا 3

نيجي دلوقتي لآخر جزء من الموضوع ده
واللى ان شاء الله حنعرف انا بتكلم في ايه

المواقف اللى انا ذكرتها في الجزء اللى فات حقولوكو ليه انا دلوقتي ذكرتها ونمسكهم واحد واحد

الموقف الأول كان بتاع لعب الكورة
وانا دلوقتي اللى وصلتله في الكورة انى بلعبها كل فين وفين في المناسبات يعني
لا انا اشتركت في فريق
ولا اتدربت ولا حتة لميت كور من ورا الجون
طب ليه ده حصل ؟
اقولوكو ليه
الطبيعي ان اي طفل من وهوا في سن صغيرة يبتدي يلعب رياضة اي رياضة هوا يحبها
وده اللى حصل معايا ولكن للأسف مجاش بابا ولا ماما يلاحظو التفوق اللى انا كنت فيه ويخلوني بقى اصقل مهاراتي عن طريق مدرب مش مجرد لعب في الشارع ولا حتى في النادي مع صحابي وخلاص
وللأسف السن اللى الواحد كان فيه يعني وهوا طفل مبيسمحلهوش انه يفكر في ايه اللى جاي بعد كده
انا كنت عاوز العب كورة وخلاص وده اللى كنت بحصل عليه وده اللى كان يهمني
لكن بعد كده ادركت فداحة الموضوع ده وان موهبتي راحت هدر

ملحوظة تانية اقولها بمناسبة موضوع الرياضة
في سن كبير شوية من حوالي اربع سنين قررت انى اتدرب تنس
وكانت المشكلة طبعا كالعادة الفلوس عشان اشتري مضرب واجيب مدرب وكده
رحت اقول لبابا ياريته قالى مفيش فلوس
لقيته بيسخر وبيستهزأ من الفكرة عامة
وقالي فيما معناه يعني هوا انت مفكر نفسك حتروح الويمبلدون
طبعا مش حقول حالتي النفسية كانت عاملة ايه سعتها
!!!!!!!!!!!!!!!!!!!!!!!!!

الموقف التاني
بتاع اللعب وكده والحقيقة هما عملو شق مهم انهم وفرولي اللعب دي
ولكن الشق التاني انهم كانو ينتبهوا لعقل ابنهم
واحد بيفكر يا جماعة بضعف سنه وبيعمل حجات مخصصة لسن بعيد اوي عنه
مش من الأولي انهم يهتموا ويعرفوا اللى جوه دماغه
مش مجرد اعجاب لمدة 5 دقايق باللى عمله يكفي
لا لازم كانوا يتصرفوا بطريقة احسن بكتير
ازاي؟
ياسيدي عندك مليون طريقة
كتب و نوادي علمية ويهتموا انهم يعرفو ايه اهتماماته وينمو قدراته العقلية وهوا في سن مبكر
!!!!!!!!!!!!!!!!!!!!!!!!!!!!!!!!

الموقف التالت
بتاع اللغات
اقولوكو انا دلوقتي بتقن كام لغة
لغة واحدة
العامية
انا بتكلم جد
انا لا بتقن انجليزى ولا الماني ولا ايطالي ولا اي حاجة
مع ان المفروض لو الحكاية دي حصلت كانوا على طول على اقرب سنتر لتعليم اللغة
وفي اسكندرية متوفرة كتييير دي حتى مراكز الثقافة البريطانية والامريكية وكل اللغات موجودة هنا
وكانت ايام منا كنت في اولي اعدادي بسعر رخيص
لكن ولا حاجة من دي حصلت
كانوا مكتفين بالمنهج الدراسي المحدود للغاية
ومفكرين انى كده خلاص بقيت معلم في اللغات
انا حبيت اتدارك الموضوع
واخدت فعلا كورسين في الايطالي و كورسين في الالماني
بس للأسف احيانا ضعف مستوى الكورساتو تضاربها مع مواعيد دراستي واحيانا اخري بسبب ارتفاع سعرها
كان حائل ضد انى اكمل
وانا دلوقتي بأمل انى اقدر الحق اي حاجة
يارب انجح في كده
!!!!!!!!!!!!!!!!!!!!!!!!!!!!!!!!
الموقف الرابع
طبعا اللى يسمع الكلمتين اللى قولتهم يقول الواد خلاص
فاضله يتعلم يعمل ويندوز ويبقى مصطفي جيتس
لكن الحقيقة
انى برده للأسف
مش متقن الكثير من الكمبيوتر
بل عدد البرامج اللى بتقنها تماما
قليل جدا
لو حد قاللي وسألني انت ياباشا اكتر حاجة في الكمبيوتر دايس فيها ايه ؟؟
حسكت ومش حعرف اجاوب لانى ببساطة مش " دايس " في حاجة
برده كالعادة المفروض ان كان ابويا ياخدنى من ايدي ويوديني لاقرب سنتر يشوفو حكايةالواد اللى بيحب الكمبيوتر ده ايه
!!!!!!!!!!!!!!!!!!!!!1

عرفتو ليه دلوقتي انى بتكلم في الموضوع ده ليه ؟؟؟ واقصد بيه ايه و؟؟ وايه حكاية المواقف دي
التربية يا جماعة مش انى اأكل عيالي واعلمهم الدين واعلمهم يكونو مؤدبين
ولما ييجي وقت المدرسة يروحوا المدرسة وادخلهم جامعة ويبقى كده ميت فل وعشرة
التربية - وخاصة في الزمن ده - ابعد ما يكون عن المفهوم الضيق جدا اللى انا ذكرته
انك تجيب طفل وتربيه
معناه بالاضافة للى انا ذكرتهم
انك تعلمه رياضة وكمبيوتر ولغات وسيبك من الكلام الحمصي اللى بيقولوه محدش حيشتغل غير بيهم
سيبك من ده لان في ناس عارفاهم ومش شغالة
انت تعمل كده لأولادك عشان يكونوا بني آدمين
تهتم باكتشاف هواياتهم من الأول وتنميها وتسيبه يجربها ويفشل مرة وينجح مرة وهكذا
انا كان نفسي لما قلت اتدرب تنس بدل ما بابا يقوللى الكلمتين دول
كان نفسي اني اجرب ولو حتى فشلت يسعتها حقتنع ان مش حينفع العبها
كتير اوي بفتقد روح الفريق والصحاب اللى في فريقك والمعسكرات والجو ده
اللى مش بشوفه غير في الأفلام الاجنبي وبس

ياريت قبل ما نخلف عيالنا نكون فاهمين الموضوع ده كله
احنا مش حنجبها لمجرد انه يحمل اسمك
لانه بصراحة لو حمل اسمك بس مش حيفيده حاجة
يارب نكون فهمنا وعرفنا ان الأطفال مسئولية الأكل والشرب والحجات دي اسهل بكتير من تكوين شخصيتهم وتربيتهم
ده في علم بحاله في سلوك الأطفال وانك ازاي تتعامل معاهم مش تضربهم عشان تقولهم كده غلط وكده كخ

ياريت اي حد فينا قبل ما يقرر انه يجيب بني آدم للدنيا
يحاول فعلا يخليه بني ادم بتصرفاته مش بشهادة الميلاد بس


كلمة اخيرة قبل ماقفل
عشان محدش يتهمنى انى مفكر نفسي عبقرى ونبغة وانى بفهم في كل المجالات
المواقف اللى ذكرتها حصلت بالفعل
وكل واحد مننا اتعرض لمواقف زي دي واكتر كمان بكتير مني
يا جماعة احنا غالبا شغالين ب 10 % من طاقة مخنا ويمكن اقل كمان
كل واحد لو دور في نفسه حيلاقي حجات كتير اويي هوا مكنش عارفها عنه وعن قدراته ومواهبه
بس اللى يدور بقى واللى يهتم انه يستغل اكتر بكتير من 10 % من مخه
ويارب اكون قدرت افيد اي حد بالكلمتين دول

ومستني حكاياتكو ومواقفكو وارائكو
سلام