نيجي دلوقتي لآخر جزء من الموضوع ده
واللى ان شاء الله حنعرف انا بتكلم في ايه
المواقف اللى انا ذكرتها في الجزء اللى فات حقولوكو ليه انا دلوقتي ذكرتها ونمسكهم واحد واحد
الموقف الأول كان بتاع لعب الكورة
وانا دلوقتي اللى وصلتله في الكورة انى بلعبها كل فين وفين في المناسبات يعني
لا انا اشتركت في فريق
ولا اتدربت ولا حتة لميت كور من ورا الجون
طب ليه ده حصل ؟
اقولوكو ليه
الطبيعي ان اي طفل من وهوا في سن صغيرة يبتدي يلعب رياضة اي رياضة هوا يحبها
وده اللى حصل معايا ولكن للأسف مجاش بابا ولا ماما يلاحظو التفوق اللى انا كنت فيه ويخلوني بقى اصقل مهاراتي عن طريق مدرب مش مجرد لعب في الشارع ولا حتى في النادي مع صحابي وخلاص
وللأسف السن اللى الواحد كان فيه يعني وهوا طفل مبيسمحلهوش انه يفكر في ايه اللى جاي بعد كده
انا كنت عاوز العب كورة وخلاص وده اللى كنت بحصل عليه وده اللى كان يهمني
لكن بعد كده ادركت فداحة الموضوع ده وان موهبتي راحت هدر
ملحوظة تانية اقولها بمناسبة موضوع الرياضة
في سن كبير شوية من حوالي اربع سنين قررت انى اتدرب تنس
وكانت المشكلة طبعا كالعادة الفلوس عشان اشتري مضرب واجيب مدرب وكده
رحت اقول لبابا ياريته قالى مفيش فلوس
لقيته بيسخر وبيستهزأ من الفكرة عامة
وقالي فيما معناه يعني هوا انت مفكر نفسك حتروح الويمبلدون
طبعا مش حقول حالتي النفسية كانت عاملة ايه سعتها
!!!!!!!!!!!!!!!!!!!!!!!!!
الموقف التاني
بتاع اللعب وكده والحقيقة هما عملو شق مهم انهم وفرولي اللعب دي
ولكن الشق التاني انهم كانو ينتبهوا لعقل ابنهم
واحد بيفكر يا جماعة بضعف سنه وبيعمل حجات مخصصة لسن بعيد اوي عنه
مش من الأولي انهم يهتموا ويعرفوا اللى جوه دماغه
مش مجرد اعجاب لمدة 5 دقايق باللى عمله يكفي
لا لازم كانوا يتصرفوا بطريقة احسن بكتير
ازاي؟
ياسيدي عندك مليون طريقة
كتب و نوادي علمية ويهتموا انهم يعرفو ايه اهتماماته وينمو قدراته العقلية وهوا في سن مبكر
!!!!!!!!!!!!!!!!!!!!!!!!!!!!!!!!
الموقف التالت
بتاع اللغات
اقولوكو انا دلوقتي بتقن كام لغة
لغة واحدة
العامية
انا بتكلم جد
انا لا بتقن انجليزى ولا الماني ولا ايطالي ولا اي حاجة
مع ان المفروض لو الحكاية دي حصلت كانوا على طول على اقرب سنتر لتعليم اللغة
وفي اسكندرية متوفرة كتييير دي حتى مراكز الثقافة البريطانية والامريكية وكل اللغات موجودة هنا
وكانت ايام منا كنت في اولي اعدادي بسعر رخيص
لكن ولا حاجة من دي حصلت
كانوا مكتفين بالمنهج الدراسي المحدود للغاية
ومفكرين انى كده خلاص بقيت معلم في اللغات
انا حبيت اتدارك الموضوع
واخدت فعلا كورسين في الايطالي و كورسين في الالماني
بس للأسف احيانا ضعف مستوى الكورساتو تضاربها مع مواعيد دراستي واحيانا اخري بسبب ارتفاع سعرها
كان حائل ضد انى اكمل
وانا دلوقتي بأمل انى اقدر الحق اي حاجة
يارب انجح في كده
!!!!!!!!!!!!!!!!!!!!!!!!!!!!!!!!
الموقف الرابع
طبعا اللى يسمع الكلمتين اللى قولتهم يقول الواد خلاص
فاضله يتعلم يعمل ويندوز ويبقى مصطفي جيتس
لكن الحقيقة
انى برده للأسف
مش متقن الكثير من الكمبيوتر
بل عدد البرامج اللى بتقنها تماما
قليل جدا
لو حد قاللي وسألني انت ياباشا اكتر حاجة في الكمبيوتر دايس فيها ايه ؟؟
حسكت ومش حعرف اجاوب لانى ببساطة مش " دايس " في حاجة
برده كالعادة المفروض ان كان ابويا ياخدنى من ايدي ويوديني لاقرب سنتر يشوفو حكايةالواد اللى بيحب الكمبيوتر ده ايه
!!!!!!!!!!!!!!!!!!!!!1
عرفتو ليه دلوقتي انى بتكلم في الموضوع ده ليه ؟؟؟ واقصد بيه ايه و؟؟ وايه حكاية المواقف دي
التربية يا جماعة مش انى اأكل عيالي واعلمهم الدين واعلمهم يكونو مؤدبين
ولما ييجي وقت المدرسة يروحوا المدرسة وادخلهم جامعة ويبقى كده ميت فل وعشرة
التربية - وخاصة في الزمن ده - ابعد ما يكون عن المفهوم الضيق جدا اللى انا ذكرته
انك تجيب طفل وتربيه
معناه بالاضافة للى انا ذكرتهم
انك تعلمه رياضة وكمبيوتر ولغات وسيبك من الكلام الحمصي اللى بيقولوه محدش حيشتغل غير بيهم
سيبك من ده لان في ناس عارفاهم ومش شغالة
انت تعمل كده لأولادك عشان يكونوا بني آدمين
تهتم باكتشاف هواياتهم من الأول وتنميها وتسيبه يجربها ويفشل مرة وينجح مرة وهكذا
انا كان نفسي لما قلت اتدرب تنس بدل ما بابا يقوللى الكلمتين دول
كان نفسي اني اجرب ولو حتى فشلت يسعتها حقتنع ان مش حينفع العبها
كتير اوي بفتقد روح الفريق والصحاب اللى في فريقك والمعسكرات والجو ده
اللى مش بشوفه غير في الأفلام الاجنبي وبس
ياريت قبل ما نخلف عيالنا نكون فاهمين الموضوع ده كله
احنا مش حنجبها لمجرد انه يحمل اسمك
لانه بصراحة لو حمل اسمك بس مش حيفيده حاجة
يارب نكون فهمنا وعرفنا ان الأطفال مسئولية الأكل والشرب والحجات دي اسهل بكتير من تكوين شخصيتهم وتربيتهم
ده في علم بحاله في سلوك الأطفال وانك ازاي تتعامل معاهم مش تضربهم عشان تقولهم كده غلط وكده كخ
ياريت اي حد فينا قبل ما يقرر انه يجيب بني آدم للدنيا
يحاول فعلا يخليه بني ادم بتصرفاته مش بشهادة الميلاد بس
كلمة اخيرة قبل ماقفل
عشان محدش يتهمنى انى مفكر نفسي عبقرى ونبغة وانى بفهم في كل المجالات
المواقف اللى ذكرتها حصلت بالفعل
وكل واحد مننا اتعرض لمواقف زي دي واكتر كمان بكتير مني
يا جماعة احنا غالبا شغالين ب 10 % من طاقة مخنا ويمكن اقل كمان
كل واحد لو دور في نفسه حيلاقي حجات كتير اويي هوا مكنش عارفها عنه وعن قدراته ومواهبه
بس اللى يدور بقى واللى يهتم انه يستغل اكتر بكتير من 10 % من مخه
ويارب اكون قدرت افيد اي حد بالكلمتين دول
ومستني حكاياتكو ومواقفكو وارائكو
سلام
Subscribe to:
Post Comments (Atom)
2 comments:
السلام عليكم
ايوه كده الموضوع كمل والواحد كمل الصوره اللى فى ذهنو
بص هو انت فعلا عندك حق فى انو احنا مفروض نحسن طريقه تربية اولادنا ونعدل او نتجنب السلبيات اللى كانت فى تربيه اهلنا . بس انت مش معايا انو المجتمع كان زمان كان غير مستوعب اللى بنقولو دلوقتى يعنى باباك لما قالك انو بلاش تلعب تنس دا لانو كان فى رأيو انو دا حيأثر على مذكرتك وعلى تركيزك وهو كان عوزك تكون مهندس كويس
اكيد تفكير غلط بس هو عمل كده لانو مجتمعنا هو اللى حط القوانين دى
حضربلك مثل علشان تفهمنى
يعنى مثلا احنا قسمنا الكليات لكليات قمه زى الطب والهندسه والصيدله يعنى معنى كده انو بقيت الكليات مش كليات قمه
مع انو فى ناس بتكون موهوبه فى الكليات التانيه والاغرب انو ممكن الاهل يدخلو حد طب وهو مثلا عاوز علوم علشان خساره المجموع
لازم نعترف انو فى سلبيات كتيره فى مجتمعنا بس الواحد بيتمنى انو الناس تتغير وتقدر مواهب ابنأهم وتشجعهم فى اختيار حياتهم ومستقبلهم اللى اكيد حيكون ان شاء الله مستقبل اسعد
و الله يا مصطفى أنا معاك فى اللى انتا قولتوا كولوه، وهضربلك مثل كمان انا لما كنت فى الثانويه العامية بتاعتنا روحت النادى مره و لعبت كره مع ناس تقريبامفكرين نفسيهم حريفة،و كان معايا فى الفريق واحد عنده 6 سنين و مع ذلك كسبنا،المهم كان بيتفرج على الماتش 2 مدربين واحد بتاع كورهو التانى بتاع ألعاب قوى(جرى تقريبا) الإثنين جولى بعد الماتش والله يتحايلوا عليا أنضم لفريق النادى سواء كوره أو جرى،و طبعاكان رد ماما و بابا معروف(أصله فى ثانويه) ومرت الأيام و دخلت هندسه و كل سنه نفس الكلام.........حماده هات تقدير بقى السنه دى عشان لما تطلع تلاقى شغل كويس،جبت تقدير فى 3 سنين من 5 وفى الأخر و لا فى شغل كويس ولا نيله و كلها محصله بعضها،يعنى لو كانوا سابونى لعبت كان ايه اللى حصل؟؟
أما بالنسبه لكلام توكا فانا شوفت واحد فعلا حصلوا كده،جاب مجموع كبير و كان عاوز يدخل هندسه و أهله دخلوه طب،و النتيجه...............عنده 30 سنه و لسه فى طب،طيب ده يبقى دكتور ازاى و لا امتى حتى؟؟؟؟ربنا يسهل و نقدر نعمل مع ولادنا اللى ما اتعملش معانا
Post a Comment