انتى ماما ....وانت بابا 2

يا اهلا بيكو مرة تانية
اجاوب بقى على السؤال اللى فات
انا يا جماعة اتربيت على انى اكون متدين - مع انى مش كده دلوقتي - وانى اكون مؤدب ومتفوق في الدراسة
بس كده
تخيلو انا كل حياتي تتلخص في التلات كلمات اللى فوق دول بس
ودلوقتي عاوزكو تستحملوني شويتين تلاتة كده لان كل الفقرات اللى جاية عبارة عن مواقف حصلت في حياتي وبعد كده حنستنتج منها انا عاوز اقول ايه
وكالعادة برده زي ما انا بحكي انتو كمان حتحكو
اتفقنا
ماشي يا عم قول

الموقف الأول

من صغري وانا بعشق حاجة اسمها كرة القدم وبالأخص وانا صغير كنت بحب لعبها اكتر من انى اتفرج عليها
وكنت انا واخويا -اللى علمته الكورة وطلع احسن مني فيها - في السعودية اياميها كان عمرى حوالى 6 سنين وهوا 4 او اكتر شوية المهم كنا بنلعب كتييير جدا مع جيراننا اللى هناك وكنا بلغة الكورة كده حريفة جدا جدا جدا
فعلا كنا بنكسب كتير وعندنا مهارات وموهبة فطرية ربنا سبحانه وتعالي اديهالنا
ورجعنا مصر واستمر الحال على ما هو عليه وكان عندي سعتها 9 سنين وهوا اكيد 7 سنين
طب ايه اللى انا عملته بمهارتي اللى كانت تأهلني انى العب في اي نادي ؟
ولا حاجة
طب ليه حصل كده ؟؟؟؟

حنعرف لما نوصل لآخر الحلقة اصدي الموضوع

الموقف الثاني

كان في ماركة العاب شهيرة جدا اسمها ليجو دي كانت متخصصة في الميكانو اللى هيا القطع اللى تفضل تجمعها لحد ما توصل شكل
المهم انا في سن 9 سنين كونت شكل الشركة كانت مخصصاه لسن 18 سنة ومافوق
طبعا طلعت عنيا فيه
بس ده مش يدل على حاجة ؟؟؟ مش مؤشر لحاجة ؟؟؟؟؟
بلاش دي
اكيد طبعا كلنا عندنا بازل القطع الصغيرة دي اللى بتركبها تطلع لوحة مرسومة
انا بقى كان بابا يجيبلي البازل كان حوالي 500 قطعة - طبعا كل ماتزيد عدد القطع تزيد الصعوبة - او كمان سعات يكون اكتر
مرضاش اقوم من على اللعبة الا وانا مخلصها وكان عندي 7 أو 8 سنين
برده ده ميدلش على حاجة ؟؟؟؟ مش مؤشر لحاجة ؟؟؟؟؟
ده غير بقى الميكانو الكتيييييييير اللى كنت بكونه واعمل اشكال من خيالي انا
وحكايات تانية في نفس النوع ده بس مش عاوز اطول عليكو
يا جماعة حد يقولي ده ميدلش على حااااااااااجة ؟؟؟؟
الموقف الثالث

انا دلوقتي في اولي اعدادي وكعادة المدارس الحكومية السنة دي اول سنة للغة الانجيليزية
عاوز اقولكو حاجة مدرستي كانت قمة في التخلف مع انها مدرسة للمتفوقين
وتخلفها يكمن انها بتجيب امتحانات تعقد الطلبة عشان يثبتوا انهم متفوقين
طبعا منطق غبي غبي غبي لاقصي درجة لكن حنعمل ايه
المهم كنت ممكن اطلع بكحكة في متحانات الشهر من جراء هذا العدوان علينا في الامتحانات
الا تخيلو في ايه
في اللغة الانجليزية كنت لما انقص نص درجة والله الواقعة دي حصلت في امتحان ترم جبت 19.5 من 20 وسعتها كنت متدايق جداااااااا
لاني كنت بقفل كل امتحانات الشهر ومش بنقص حاجة
طب التفوق والنبوغ المبكر ده في الانجليزي ميدلش على حاجة ؟؟؟ مينبؤش بحاجة ؟؟؟
وهكذا استمريت طوال فترة الاعدادى والثانوي وانا معروف لكل مدرسين اللغات
لكن ايه اللى حصل بعد كل ده ؟؟؟؟؟
الموقف الرابع

وصلنا دلوقتي لأولي ثانوي وبابا مشكووور جدا جابلي كمبيوتر وكنت كمان اول واحد في صحابي اجيبه
المهم انا بعشق حاجة اسمها كمبيوتر فكنت مش بقوم من عليه وطبعا كعادة كل الناس اللى ادي سعتها كانو مدمنين العاب ويمكن ميعرفوش حاجة في الكمبيوتر غيره
لكن انا وبفضل الله فضلت اعلم نفسي حجات كتير والاحظ اي حد انا قاعد معاه بيعمل ايه من غير حتى ما اسأله
كان عندي شغف غير عادي بالكمبيوتر وانى لازم اتعلمه
اتعلمت لوحدي حجات كتير اوييييييي غيري معرفهاش غير لما خد كورسات وده شئ انا بحمد ربنا عليه
ولكن ايه اللى حصل بعد مرور السنين دي
هل انا بقيت محترف ؟؟؟؟ هل قدرت انى اخلص تعلم اجزاء كتيرة من علم وفروع الكمبيوتر ؟؟؟؟
مواقف زي دي اتكررت كتير في نفس المجالات اللى ذكرتها او مجالات تانية زي الموسيقى والقراءة
ودلوقتي خلص وقت الحكي
وجه معاد الاستنتاج